Dekabrın 23-də Təhsil Şöbəsinin yeni inzibati idarə binasının təntənəli açılışı oldu. Heydər Əliyev prospektində ucaldılmış üçmərtəbəli, müasir standartlara cavab verən, həmçinin istilik sistemi, elektron, kompüter avadanlıqları, komfort mebellər və inventarlarla təchiz olunmuş Yevlaxın təhsil ocaqlarının mərkəzi öz milli memarlıq üslubu və arxitektura görkəmi ilə də fərqlənir. Şəhər rəsmilərinin, pedaqoji kollektivlərin, şəhər ictimaiyyəti nümayəndələrinin iştirak etdiyi tədbiri Yevlax Şəhər İcra Hakimiyyəti Başçısının müavini, ictimai-siyasi və humanitar məsələlər şöbəsinin müdiri Elnarə Məmmədova açdı.      

            O, öz çıxışında ulu öndərin siyasi  kursunun layiqli davamçısı möhtərəm Prezidentimiz  İlham Əliyev cənablarının son 12 ildə ölkəmizdə təhsilin inkişafına göstərdlyi diqqət və qayğıdan  böyük qürur hissi ilə danışdı.Dövlət himni ifa olundu. Şəhər Təhsil Şöbəsinin müdiri Zərifə Məmmədova tribuna önünə keçdi. O, ölkə başçısının milli təhsilimizin dünya təhsilinə  inteqrasiya etməsi istiqamətində həyata keçirdiyi möhtəşəm islahatların səmərəli nəticəsindən faktların dili ilə danışdı. Əlavə etdi ki, Yevlaxın  təhsil işçilərinin istifadəsinə verilən və təntənəli açılışına toplaşdığımız yeni inzibati idarə binası rayonun pedaqoji və şagird kontingentinə möhtərəm Prezidentimiz İlham Əliyev cənablarının təhsilə göstərdiyi qayğının parlaq nümunəsidir.Respublikanın əməkdar müəllimi, Akademik M.Mehdizadə mükafatının laureatı, ölkə Prezidentinin 21 dekabr 2015- ci il tarixli sərəncamı ilə keçirilən “İlin ən yaxşı müəllimi” müsabiqəsinin ilk yevlaxlı qalibi olmuş 5 nömrəli tam orta məktəbin tarix müəllimi Əmiraslan Bəşirov rayonumuzun təhsil ictimaiyyəti adından möhtərəm Prezidentimiz İlham Əliyev cənablarına ən xoş duyğularını çatdırdı.                                                                                                               Şəhər İcra Hakimiyyətinin Başçısı Qoca Səmədov  çıxışına qarşıdan gələn   gözəl  bayramlar ərəfəsində istifadəyə verilən  Şəhər Təhsil Şöbəsinin inzibati idarə binasını möhtərəm Prezidentimiz İlham Əliyev cənablarının Yevlaxın  təhsil işçilərinə ən yaxşı töhfəsi kimi qiymətləndirməklə başladı. Onu da  iştirakçıların nəzərinə çatdırdı ki, müstəqil  respublikamızda təhsilə göstərilən qayğı ölçüyəgəlməz dərəcədə yüksəkdir. Hamımız canlı şahidik ki, son bir neçə il ərzində şəhərimizin 1, 2, 3, 10 saylı məktəbləri  tamamilə yeni layihələr əsasında tikilib istifadəyə verilib. Bu xeyirxah missiya  rayonumuzun kənd və qəsəbələrində də intensiv   davam etdirilir ki, bu da dövlət  başçısının təhsilə qayğısının tərkib hissəsidir. ŞİH Başçısı yeni Təhsil Şöbəsinin açılışı münasibətilə təhsil işçilərini təbrik edərək onlara müstəqil dövlətimizə layiq  bilikli. savadlı, yüksək  intellektli  vətəndaş yetişdirmək kimi məsuliyyətli və şərəfli vəzifələrində  uğurlar  arzuladı.Açılış lenti kəsildikdən sonra ŞİH Başçısı və onu müşaiyət edənlər  Şəhər Təhsil Şöbəsinin iş otaqları ilə yaxından tanış oldular.                                                                                                                                                                                               Tədbir iştirakçıları binanın foyesində nəfis şəkildə, yüksək zövqlə tərtib olunmuş ulu öndərin mənalı həyatının bir neçə anını və möhtərəm Prezidentimiz İlham Əliyev cənablarının siyasi fəaliyyətini əks etdirən foto-stendlərə maraqla tamaşa etdilər.