Şagird sayı 500-dək olan ümumi təhsil müəssisələrinə direktorların işə qəbulu müsabiqəsi ilə bağlı ən çox verilən suallar və cavablar

 

    1. Şagird sayı 500-dək və hazırda direktor vəzifəsi vakant olan ümumi təhsil müəssisələrinə direktorların işə qəbulu üzrə müsabiqədə (bundan sonra – Müsabiqə) kimlər iştirak edə bilər?

 

    - Müsabiqədə pedaqoji və ya idarəetmə ixtisas sahələri üzrə ali təhsilli, 5 ildən az olmayaraq (elmi dərəcəsi və ya elmi adı olduqda 3 il) pedaqoji stajı olan və hazırda yerli təhsili idarəetmə orqanlarının tabeliyindəki ümumi təhsil müəssisələrində pedaqoji fəaliyyətlə məşğul olan şəxslər iştirak edə bilərlər.

 

    2. Müsabiqə hansı mərhələlərdən ibarətdir?

 

    - Şagird sayı 150-dək olan ümumi təhsil müəssisələrinə direktorların işə qəbulu 3 (üç) mərhələdən (sənəd qəbulu, müsahibə və vakant yerlərə yerləşdirilmə), şagird sayı 151-500-arası olan ümumi təhsil müəssisələrinə direktorların işə qəbulu isə 4 (dörd) mərhələdən (sənəd qəbulu, test imtahanı, müsahibə və vakant yerlərə yerləşdirilmə) ibarət müsabiqə yolu ilə keçirilir.

 

    3. Müsabiqəyə sənədlərin qəbulu üçün qeydiyyat hansı qaydada həyata keçirilir?

 

- Müsabiqədə iştirak etmək istəyən namizədlər 04-11 aprel tarixlərində tələb olunan sənədləri Regional Təhsil İdarəsində yaradılmış komissiyaya təqdim etməklə qeydiyyatdan keçə bilərlər.

 

    4. Müsabiqədə iştirak üçün hansı sənədlər təqdim olunmalıdır?

 

    - Kadrlar uçotunun şəxsi vərəqəsi;

    - Şəxsiyyət vəsiqəsinin surəti;

    - Əmək kitabçasının surəti;

    - Ali təhsil haqqında sənədin və əlavənin surəti təqdim olunmalıdır.

 

    5. Namizəd haqqında məlumatların müsabiqənin şərtlərinə uyğunluğu necə müəyyənləşdirilir?

 

    - Namizəd haqqında məlumatların müsabiqənin şərtlərinə uyğunluğu regional təhsil idarələrinin müvafiq komissiyası tərəfindən araşdırılır və tələblərə cavab verən namizədlərin sənədləri qəbul edilir.

 

    Qeyd: Müsabiqənin hər hansı bir mərhələsində namizədin təqdim etdiyi sənədlərində uyğunsuzluq aşkar olunduğu halda, namizədin müsabiqənin şərtlərinə uyğunluğuna imtina verilə bilər.

 

    6. Namizədlər sənəd qəbulunda neçə vakant yer seçə bilərlər?

 

- Namizədlər hazırda işlədiyi ümumi təhsil müəssisəsinin tabe olduğu təhsil idarəsi üzrə 4 vakant ümumi təhsil müəssisəsini seçə bilərlər.

 

    7. Müsabiqənin sənəd qəbulu mərhələsində namizədlər hər iki kateqoriya üzrə (şagird sayı 150-dək və şagird sayı 151-500 arası ) vakant yer seçimi edə bilərlərmi?

 

    - Bəli, namizədlər maksimum 4 (dörd) olmaqla hər iki kateqoriya üzrə (şagird sayı 150-dək və şagird sayı 151-500 arası) vakant yer seçimi edə bilərlər.

 

    8. Müsabiqədə uşaq birliyi təşkilatı rəhbərləri, psixoloqlar, gənclərin çağırışaqədərki hazırlığı rəhbərləri iştirak edə bilərlərmi?

 

    - Bəli, müvafiq tələblər gözlənilməklə iştirak edə bilərlər.

 

    9. Mərkəzi Aran RTİ-nin tabeliyindəki ümumi təhsil müəssisələrində deyil, digər yerli təhsili idarə orqanlarının tabeliyində fəaliyyət göstərən ümumi təhsil müəssisələrində pedaqoji fəaliyyət göstərən şəxslər Mərkəzi Aran RTİ-nin tabeliyindəki ümumi təhsil müəssisələrində vakant olan yerlərlə bağlı müsabiqədə iştirak edə bilərlərmi?

 

    - Xeyr.

 

    10. Müsabiqənin test və müsahibə mərhələləri hansı formada təşkil olunacaq?

 

    - Şagird sayı 150-dək olan ümumi təhsil müəssisələri üzrə müraciət edən namizədlərlə video-çəkiliş təmin edilməklə müsahibə, şagird sayı 151-500 arası olan ümumi təhsil müəssisələrinə müraciət edən namizədlərlə əvvəlcə test imtahanı, uğur qazanan namizədlərlə video-çəkiliş təmin edilməklə müsahibə təşkil edilir.

 

11.Test imtahanı mərhələsində namizədlərin bilikləri hansı bölmələr üzrə yoxlanılacaq?

 

    - Müsabiqənin test imtahanı mərhələsində namizədlərə tənqidi oxu, riyazi və məntiqi düşünmə bacarıqlarının, təhsil qanunvericiliyi ilə bağlı biliklərin yoxlanılması məqsədilə hər bölmə üzrə 15 sual olmaqla, ümumilikdə 45 test tapşırığı təqdim ediləcək.

 

    12. İmtahan neçə dəqiqə müddətində təşkil olunacaq?

 

    - Test imtahanının müddəti 80 dəqiqə olacaq.

 

    13. Müsabiqənin keçid balı nə qədərdir?

 

    - Müsabiqənin test imtahanı mərhələsinin keçid balı 24-dur.

 

    14. Müsahibə mərhələsində namizədlərin bilikləri necə yoxlanılacaq?

 

    - Müsahibə mərhələsində namizdlərin vəzifə üzrə praktiki bilikləri, idarəetmə bacarıqları və şəxsi keyfiyyətləri 5 ballıq şkala ilə qiymətləndirilir. Ümumi orta bal 3 və daha yuxarı olduqda nəticə məqbul hesab olunur.

 

    15. Hər hansı bir səbəbdən göstərilən vaxtda imtahanda və müsahibədə iştirak etməyənlər üçün təkrar imtahan və ya müsahibə keçirilicəkmi?

 

    - Xeyr.

 

    16. Hansı namizədlərə üstünlük tətbiq oluna bilər?

 

    - Bir vakant yerə müsabiqədə uğur qazanaraq eyni bal toplayan 1-dən çox namizəd olduğu halda aşağıda qeyd olunan üstünlük hüquqları tətbiq olunur:

 

    Müəllimlərin işə qəbulu üzrə müsabiqə, sertfikatlaşdırma və ya diaqnostik qiymətləndirmə imtahanında yüksək nəticə əldə etmiş şəxslərə üstünlük verilir.

 

    17. İşə qəbul olmuş direktorların iş yerinin dəyişdirilməsi həyata keçirilirmi?

 

    - Müsabiqənin nəticəsinə əsasən təyinat almış direktorlar 3 ildən artıq müddətdə təyin olunduğu müəssisədə işlədiyi halda şagird sayı daha çox olan məktəblərə məktəbin son 3 il ərzində buraxılış imtahanları və məzunların ali məktəblərə qəbul nəticələri nəzərə alınaraq Nazirlik tərəfindən qərar qəbul edilməklə onların yerdəyişməsinə icazə verilir.

Direktor müavinləri və təşkilatçı vəzifələrinə işə qəbulla bağlı ən çox verilən suallar və cavabları

 

Sual 1: Dövlət ümumi təhsil müəssisələrində hazırda vakant olan tədris (təlim-tərbiyə) işi üzrə direktor müavini və məktəbdənkənar və sinifdənxaric tərbiyə işi üzrə təşkilatçı vəzifələrinə işə qəbul üzrə müsabiqədə (bundan sonra – Müsabiqə) kimlər iştirak edə bilər?

 

Cavab: Müsabiqədə pedaqoji ixtisas üzrə ali təhsilli, 3 ildən az olmayaraq pedaqoji stajı olan və hazırda ümumi təhsil müəssisəsində müəllim kimi pedaqoji fəaliyyət göstərən şəxslər iştirak edə bilərlər.

 

Sual 2: Pedaqoji ixtisas üzrə ali təhsilli və 3 ildən az olmayaraq pedaqoji stajı olan, lakin hazırda ümumi təhsil müəssisələrində işləməyən şəxslər müraciət edə bilərmi?

 

Cavab: Xeyr, müsabiqədə iştirak edə bilməz.

 

Sual 3: Müsabiqədə uşaq birliyi təşkilatı rəhbəri, laborant, psixoloqlar, kitabxanaçı (kitabxana müdiri) və gənclərin çağırışaqədərki hazırlığı rəhbərləri iştirak edə bilərlərmi?

 

Cavab: Xeyr, Müsabiqədə iştirak edə bilməzlər.

 

Sual 4: Müsabiqə hansı mərhələlərdən ibarətdir?

 

Cavab: Direktor müavinlərin işə qəbulu 4(dörd) mərhələdən ibarət müsabiqə yolu ilə keçirilir:

  • Qeydiyyat;
  • Sənədlərin yoxlanılması;
  • Test imtahanı;
  • Müsahibə.

 

 

Sual 5: Müsabiqəyə sənədlərin qəbulu üçün qeydiyyat hansı qaydada həyata keçiriləcək?

 

Cavab: Müsabiqəyə qeydiyyat 2 formada aparılacaq. İştirak etmək istəyən namizədlər 01-05 noyabr tarixlərində tələb olunan sənədləri Mərkəzi Aran Regional Təhsil İdarəsinə təqdim etməklə və ya elektron qaydada müvafiq keçid linkinə daxil olmaqla qeydiyyatdan keçə bilərlər.

 

Sual 6. Müsabiqədə iştirak üçün hansı sənədlər təqdim olunmalıdır?

 

Cavab: Müsabiqədə iştirak üçün aşağıda qeyd olunan sənədlər təqdim olunmalıdır:

  • Şəxsiyyət vəsiqəsinin surəti;
  • Əmək kitabçasının surəti;
  • Ali təhsil haqqında sənədin və əlavənin surəti təqdim olunmalıdır.

 

Sual 7. Namizədlər neçə vakant yer seçə bilərlər?

 

Cavab: Namizədlər elan olunmuş ümumi təhsil müəssisələri üzrə 4 (dörd) vakant yerə səçə bilərlər.

 

Sual 8. Namizəd haqqında məlumatların müsabiqənin şərtlərinə uyğunluğu necə müəyyənləşdirilir?

 

Cavab: Namizəd haqqında məlumatların müsabəqinin şərtlərinə uyğunluğu Mərkəzi Aran Regional Təhsil İdarəsinin müsabiqə komissiyası tərəfindən araşdırılır və tələblərə cavab verən namizədlərin sənədləri təsdiq edilir, həmçinin nəticə barədə sms vasitəsilə bildiriş göndərilir.

 

Sual 9. Mərkəzi Aran RTİ-nin əhatə etdiyi şəhər/rayonlar üzrə deyil, digər şəhər və rayonlarda fəaliyyət göstərən ümumi təhsil müəssisələrində işləyən müəllimlər Mərkəzi Aran RTİ-nin tabeliyindəki ümumi təhsil müəssisələrindəki vakant olan yerlərlə bağlı müsabiqədə iştirak edə bilərlərmi?

 

Cavab: Bəli.

 

Sual 10. Test imtahanı mərhələsində namizədlərə hansı məzmunda tapşırıqları təqdim olunacaq?

Cavab:Müsabiqəsinin test imtahanı mərhələsində namizədlərə pedaqogika və metodika, əmək və təhsil qanunvericiliyi, riyazi məntiq üzrə hər birinə aid 10 sual olmaqla, ümumilikdə 40 test tapşırığı təqdim olunacaq.

 

Sual 11. İmtahan neçə dəqiqə müddətində təşkil olunacaq.

 

Cavab: Test imtahanının müddəti 80 dəqiqə olacaq.

 

Sual 12. Müsabiqənin keçid balı nə qədərdir?

 

Cavab: Test imtahanında sualların yarısını düzgün cavablandırmış namizədlər növbəti mərhələdə iştirak etmək hüququ qazanacaqlar.

 

Sual 13. Müsahibə mərhələsində namizədlərin bilikləri necə yoxlanılacaq?

 

Cavab: Müsahibə mərhələsində namizdlərin vəzifə üzrə praktiki bilikləri, idarəetmə bacarıqları və şəxsi keyfiyyətləri 5 ballıq şkala ilə qiymətləndirilir. Ümumi orta bal 3 və daha yuxarı olduqda nəticə məqbul hesab olunur.

 

Sual 14. Hansı namizədlərə üstünlük tətbiq oluna bilər?

 

Cavab: Bir vakant yerə müsabiqədə uğur qazanaraq eyni bal toplayan 1-dən çox namizəd olduğu halda aşağıda qeyd olunan üstünlük hüquqları tətbiq olunur:

  • Müəllimlərin işə qəbulu üzrə müsabiqə, sertfikatlaşdırma və ya diaqnostik qiymətləndirmə imtahanında yüksək nəticə əldə etmiş şəxslərə və direktor vəzifəsinə işə qəbul üzrə müsabiqədə ehtiyat kadr siyahısına daxil edilmiş namizədlərə, eləcə də müsahibə mərhələsində nəticələri yüksək olan namizədlərə üstünlük verilir.

 

Sual 15.  Müsahibədə uğur qazanan, lakin vakant yer seçməyən namizədlər ehtiyat kadrlar siyahısına daxil edilirmi, edilərsə hansı müddəti əhatə edir.

 

Cavab: Bəli, həmin namizədlər 1 (bir) il müddətində ehtiyat kadr siyahısına daxil edilir.

Sual: Uşaqların I sinfə qəbulunun qanunvericilik əsasları

Cavab: Uşaqların I sinfə qəbulu “Təhsil haqqında” Azərbaycan Respublikasının Qanununa, Azərbaycan Respublikası Nazirlər Kabinetinin 13 yanvar 2011-ci il tarixli, 5 nömrəli qərarı ilə təsdiq edilmiş “Ümumtəhsil məktəbinin Nümunəvi Nizamnaməsi”nə, Azərbaycan Respublikası Təhsil Nazirliyi Kollegiyasının 06 noyabr 2014-cü il tarixli 1/3 nömrəli qərarı ilə təsdiq edilmiş “Uşaqların (şagirdlərin) ümumi təhsil müəssisələrinə qəbulu və yerdəyişməsi Qaydaları”na və digər hüquqi normativ aktlara əsasən həyata keçirilir.

Sual: Məktəblərin seçimi hansı qaydada aparılır?

Cavab: Valideyn (digər qanuni nümayəndə) uşağının təhsil almasını arzu etdiyi məktəbi müəyyənləşdirməli və elektron sistemdə onu siyahıya daxil etməlidir.

Sual: 6 yaşı tamam olmayan uşaqların məktəbə qəbulu hansı əsaslarla və nə vaxt aparılır?

Cavab: Azərbaycan Respublikası təhsil nazirinin “Xüsusi istedada malik uşaqların vaxtından əvvəl I sinfə qəbulu Qaydaları”nin təsdiq edilməsi barədə 17 iyul 2013-cü il tarixli, 739 nömrəli əmrin 3-cü bəndinə əsasən hər il 16 sentyabr-31 dekabr müddətində 6 yaşı tamam olacaq uşaqlar müsahibəyə cəlb edilirlər. Həmin əmrin 8-ci bəndinə əsasən müsahibə komissiyaları rayon (şəhər) təhsil şöbələrinin (idarələrin) müəyyən etdiyi günlərdə sentyabrın 10-dək həyata keçirilməlidir.

Sual: Uşaqların yerləşdirilməsi necə həyata keçirilir?

Cavab: Məktəbdə fəaliyyət göstərən şagird qəbulu üzrə işçi qrupdan müsbət rəy aldıqdan sonra.

Sual: Ailə vəziyyəti ilə bağlı kənd məktəbindən şəhər məktəbinə iş yerini necə dəyişmək olar?

Cavab: Bir rayon (şəhər) daxilində müəllimlərin yerdəyişməsi məsələsinə rayon (şəhər) təhsil şöbəsi (idarəsi) tərəfindən baxılır. Bir rayondan (şəhərdən) digər rayona (şəhərə) iş yerinin dəyişdirilməsi üçün isə ərizə ilə Təhsil Nazirliyinə müraciət edilməlidir. Təhsil Nazirliyi tərəfindən müraciətə baxılır və aparılan araşdırmanın nəticəsinə uyğun olaraq müvafiq cavab verilir.

Sual: Gənclərin təhsilə marağını daha da artırmaq üçün magistrlərin işə qəbulu zamanı müəyyən güzəştlər tətbiq edilə bilərmi?

Cavab: İşə qəbul zamanı magistrlər üçün heç bir güzəşt və ya imtiyaz nəzərdə tutulmamışdır. Lakin ali təhsil müəssisələrində yeni maliyyələşmə mexanizminin tətbiqi ilə bağlı hər bir müəllim öz əməyinin nəticələrinə görə qiymətləndiriləcək. Belə olduğu halda digər müəllimlərlə yanaşı, magistr dərəcəsi olan müəllimlərin də maddi və mənəvi cəhətdən fərqli qiymətləndirilməsinə imkan yaranacaqdır.

Sual: Müəllimlərin işə qəbulu üçün imtahan nəyə görə keçirilir? Bunun vacibliyi zərurəti haradan yaranıb?

Cavab: Ümumiyyətlə, beynəlxalq təcrübədə müəllimlərin işə qəbulu üzrə mərkəzləşdirilmiş mexanizmlər tətbiq edilir. Belə bir mexanizmin tətbiqinin zəruriliyi bir sıra amillərlə bağlıdır. Təhlillər göstərirdi ki, ehtiyac olmadan məktəblərə az dərs saatlarına, bir sıra hallarda isə saxta, dövlət nümunəli olmayan təhsil sənədləri ilə müəllimlər qəbul edilir və bu zaman onların peşəkarlıq səviyyəsi yoxlanılmır. Bu da təhsilin keyfiyyətinə mənfi təsir edirdi. Digər səbəb ondan ibarətdir ki, bir vakant yerə yüzlərlə müəllim iddia edir və seçim aparmaq üçün mərkəzləşdirilmiş imtahan mexanizmi tətbiq edilir.

Sual: Hazırda ümumtəhsil məktəblərində çalışan müəllimlərin hesabına müxtəlif ixtisaslara olan tələbatın ödənilməsi mümkündürmü və bu sahədə fəaliyyət nəzərdə tutulurmu?

Cavab: Əlavə təhsil fəaliyyətinin ən mühüm istiqamətlərindən biri də yenidənhazırlanma təhsilidir. Hazırda müxtəlif ali təhsil müəssisələrində istər pedaqoji, istərsə də qeyri-pedaqoji ixtisaslar üzrə kadr hazırlığı həyata keçirilir. Bu zaman yenidənhazırlanma təhsilinə müraciət edənlərin ilkin baza ixtisasları ilə yenidənhazırlanmaq istədikləri ixtisaslar arasındakı uyğunluq tələbi nəzərə alınır.

Sual:Müəllimlərin bilik və bacarıqlarının diaqnostik qiymətləndirilməsinin keçirilməsində məqsəd nədir? Ötən il diaqnostik qiymətləndirmədən keçə bilməyən müəllimlər üçün təlimlər təşkil edilibmi?

Cavab: Diaqnostik qiymətləndirmənin məqsədi müəllimlərin bilik və bacarıq səviyyələrinin müəyyənləşdirilməsi, onların dərs yükü normasını və əməkhaqqını artırmaqla maddi rifahının yaxşılaşdırılması, eləcə də qiymətləndirmənin nəticəsi əsasında müvafiq olaraq inkişafyönümlü təlimlərə cəlb edilməsidir.
İlk dəfə Bakı şəhərində keçirilən diaqnostik qiymətləndirmədə aşağı nəticə göstərən müəllimlər müvafiq təlimlərə cəlb edilib. Təlimlər bitdikdən sonra həmin kontingent yenidən imtahan verib və yüksək nəticə göstərib.

Sual:Dövlət sifarişi ilə ümumi təhsil müəssisələrində əmək fəaliyyətinə başlayan gənc mütəxəssislər üçün hansı güzəştlər nəzərdə tutulur?

Cavab: Azərbaycan Respublikası Nazirlər Kabinetinin 14.04.2010-cu il tarixli 67 nömrəli və 15.08.2014-cü il tarixli 279 nömrəli Qərarlarına əsasən dövlət sifarişi ilə ümumi təhsil müəssisələrində (kənd rayonlarında yerləşən) əmək fəaliyyətinə başlayan və 3 il müddətində həmin təhsil müəssisəsində fəaliyyətini davam etdirən gənc mütəxəssislərə kommunal xidmətləri və yaşayış yerinin kirayə haqqını ödəmək üçün 60 manat məbləğində kompensasiya, rayon mərkəzlərindən 20 km-dən artıq məsafədə yerləşən ümumi təhsil müəssisələrində əmək fəaliyyətinə başlayan və yaşı 35-dək olan gənc mütəxəssislərə 3 il müddətində aylıq əməkhaqqına ayda 100 manat məbləğində əlavə ödənilməsi nəzərdə tutulub. 3 illik müddət bitdikdən sonra həmin və ya digər kənd məktəbində pedaqoji fəaliyyətini davam etdirən gənc mütəxəssislərə daha 2 il müddətində kompensasiya və əməkhaqqına əlavə ödənilməsi nəzərdə tutulub.

Sual:Bu il müəllimlərin işə qəbulu üzrə imtahanlar nə vaxt keçiriləcək? Vakant yerlərin sayı müəyyənləşdirilibmi?

Cavab: Müəllimlərin işə qəbulu və iş yerinin dəyişdirilməsi üzrə müsabiqələr hər il olduğu kimi, bu il də tədris ilinin sonu keçiriləcəkdir. Respublikanın ümumi təhsil müəssisələrində vakant yerlər haqqında məlumatlar hər tədris ilinin sonunda Təhsil Nazirliyinə təqdim olunur.

Sual: Vahid məktəbli forması anlayışı varmı? Məktəbli forması məsələsi rayonlarda necə tənzimlənir? Məktəblilərin məktəbə forma ilə gəlməsi vacibdirmi?

Cavab: Uşaqlar məktəbə məktəbli formasında gəlməlidirlər. Məktəbli formasının dizaynı fərqli ola bilər. “Təhsil haqqında” Azərbaycan Respublikasının Qanununa və “Ümumtəhsil məktəbinin Nümunəvi Nizamnaməsi”nə uyğun olaraq, şagirdlərin geyim forması təhsil aldıqları məktəbin nizamnaməsi ilə müəyyən edilir.

Sual: Mümkünsə, şagirdlərə hansı dərsliklərin pulsuz veriləcəyini açıqlayın. Bundan əlavə, metro keçidlərində, bəzi kitab mağazalarında üzərində “pulsuz” yazılmış dərsliklər satılır. Nazirlik üzərində “pulsuz” yazılmış dərsliklərin satışına icazə verirmi?

Cavab: Cavab: Dövlət ümumtəhsil məktəblərinin şagirdləri bütün dərsliklərlə pulsuz təmin olunurlar. Üzərində “pulsuz” yazılmış dərsliklərin satışının qarşısının alınması digər müvafiq dövlət qurumlarının səlahiyyətindədir.