Mayın 5-də Yeni Azərbaycan Partiyası Yevlax rayon təşkilatı Şəhər Təhsil Şöbəsi ilə birgə rayonun ümumtəhsil məktəblərinin IX-XI sinif şagirdləri arasında ulu öndərin anadan olmasınının 93-cü ildönümünə həsr olunmuş ənənəvi inşa yazı  müsabiqəsinə start verdi. Şəhərin Şahmat məktəbinin geniş zalında keçirilən maraqlı inşa yazı müsabiqəsi “Müstəqil Azərbaycan Heydər Əliyevin şah əsəridir”, “Tarix və xalq Heydər Əliyevi hər zaman yaşadacaq” və “Heydər Əliyev və ordu quruculuğu” mövzuları  idi.

Tədbirdə Şəhər Təhsil Şöbəsinin müdiri  Zərifə Məmmədova çıxış edərək ulu öndərin hər kəsə örnək olan həyat və fəaliyyəti ilə bağlı məktəblilər arasında inşa yazı müsabiqəsinin təşkil olunmasını yüksək vətənpərvərlik təşəbbüsü kimi dəyərləndirdi və müsabiqə  iştirakçılarına uğurlar arzuladı.

YAP Yevlax rayon təşkilatının aparat rəhbəri Əli Quliyev iştirakçıları salamladıqdan sonra müsabiqənin qalibləri üçün 3 mükafatlı yer müəyyənləşdirildiyini dedi. Onu da fərəh hissi ilə vurğuladı ki, müstəqil Azərbaycanımızın bu günədək əldə etdiyi  möhtəşəm uğurları  Heydər Əliyevsiz təsəvvür etmək mümkünsüzdür. Çünki dahi şəxsiyyət  hələ  sağlığında öz xalqının dərin məhəbbətini qazanmış və hər birimizin qəlbində  əbədi yaşayır. Və  çox  qürurverici haldır ki, yetişməkdə olan  gənc nəsil də ulu öndərə  sonsuz sevgi və məhəbbətini onun ideylarını və  zəngin  irsini dərindən  öyrənməklə sübut edir.

“Kür” qəzetinin baş redaktoru, YAP Yevlax  rayon təşkilatı Qadınlar Şurasının sədri Əminə Yusifqızı vurğuladı ki, siz məktəblilər müstəqil  Azərbaycanımızın banisi və yaradıcısı, hər birimizin qəlbində özünün əzəmətli heykəlini ucaltmış Heydər  Əliyev  kimi dahi şəxsiyyətin  həyat və fəaliyyətini ədəbi və bədii sözün qüdrəti ilə işıqlandırmaq  şansı qazanmısınız. Sizə uğurlar  arzulayır,  hamınızı  qalib kimi dəyərələndirir və qəlbən  təbrik edirəm.

Ulu öndərin ölməz xatirəsinə  həsr olunmuş inşa yazı müsabiqəsinin açılışında iştirak edən  Yevlax Şəhər İcra Hakimiyyəti Başçısının müavini  Elnarə  Məmmədova tədbirin təşkilatçılarını ŞİH Başçısı adından təbrik edərək onun işinə  uğurlar arzuladı.

Şəhər Təhsil  Şöbəsinin metodisti Sirac Sarıyev isə şagirdləri müsabiqənin mövzusu, şərtləri və reqlament vaxtı ilə tanış etdi. İnşa yazı müsabiqəsində Gülövşə kənd tam orta məktəbin XI sinif şagirdi Nigar Məhərrəmova 1-ci, Aran 2 qəsəbə tam orta məktəbin IXb sinif şagirdi Nərmin Tapdıqlı 2-ci, 1 nömrəli tam orta məktəbin Xa sinif şagirdi Ləman Abdullazadə isə 3-cü mükafata layiq görüldülər