Aprelin 15-də şəhər 1 saylı tam orta məktəbin geniş akt zalında “Yuxarı  sinif şagirdlərinin peşə seçimində valideynlərin rolu” mövzusunda tədbir keçirildi. Azərbaycan Respublikası Əmək və Əhalinin Sosial  Müdafiəsi nazirliyi ilə  Respublika Təhsil nazirliyinin birgə hazırladıqları proqrama uyğun keçirilən tədbirin əsas iştirakçıları həmin məktəbin IX, X, XI sinif şagirdləri. onların valideynləri, Şəhər Təhsil  Şöbəsinin nümayəndəsi və peşə məktəblərinin rəhbərləri idi. Tədbiri giriş  sözü ilə  Məşğulluq Mərkəzinin direktoru Fəxrəddin  Hacıyev açdı. O, rayonun iqtisadiyyatına müvafiq peşə seçmək üçün mövcud əmək bazarı haqqında məlumat  verərək əmək bazarında kəskin  ehtiyac duyulan ixtisas  və peşələrin təsnifatını iştirakçıların diqqətinə  çatdırdı.

Tədbirdə iştirak edən Respublika  Əmək və Əhalinin  Sosial  Müdafiəsi   Nazirliyinin peşə və təlim  mərkəzinin rəhbəri  Elnur  Tağıyev öz  çıxışında qeyd etdi ki.  insan  həyatının ən  taleyüklü məsələlərindən biri də onun erkən yaşlarından qəlbinin  istəyincə peşə, sənət və ixtisas seçməsidir. Lakin  çoxumuz  şahidi olmuşuq ki, bu sahədə  düzgün seçim  etməyənlər sonradan  öz  səhvlərini anlayır.  Lakin həmin səhvi düzəltmək isə artıq gec  olur.  Məhz ona görə də dövlətimiz ölkənin hər bir vətəndaşınının, xüsusən, lap erkən  yaşlarından, yeniyetmələrin, və məktəbli  gənclərin  peşə, ixtisas və sənət  seçməsinə  yardımçı olmaq, onlara düzgün istiqamət vermək   kimi aktual məsələlərə  ciddi önəm verir.

               Natiq onu da vurğuladı ki, uşaqların  peşə seçimində valideynlər və müəllimlər də fəal kömək göstərməli, lakin onları sevmədikləri peşəyə, ixtisasa yiyələnməyə təhrik etməməlidirlər.

             Nazirliyin peşə və təlim  mərkəzinin  psixoloqu  Natella   Əliyeva isə   peşə seçməkdə  psixorloji durumun və xüsusiyyətlərin  nəzərə  alınması  zəruriliyindən danışdı. Xüsusilə vurğuladı ki,  insanın  öz  peşəsini   düzgün seçməməsi  onlarda  özünə inamsızlıq, psixoloji   gərginlik  yaradır. Və ona  görə də peşə seçərkən tələsməməli,  insanın  həyat kredosu  olan bu seçimdə səhvə  yol  verməməlidir.

               Axırda  şagirdlər arasında “Nə üçün həmin ixtisası seçirsən?” mövzusunda maraqlı interaktiv  sorğu  keçirildi və onlara “Peşəyönümü məsləhətləri üzrə metodiki  vəsait” paylandı.                                                              Direktor Xalidə  Əzizova maraqlı tədbiri yekunlaşdıraraq təşkilatçılara məktəbin pedaqoji kollektivi və şagird  kontingenti   adından təşəkkürünü bildirdi.