05 oktyabr 2018-ci il tarixdə Yevlax Şəhər Təhsil Şöbəsinin akt zalında Beynəlxalq “Müəllimlər günü” münasibətilə tədbir keçirilib. Tədbirdə  Yevlax Şəhər İcra Hakimiyyətinin nümayəndəsi Vaqif Əliyev  və  “Kür” qəzetinin baş redaktoru, “Əməkdar jurnalist” Əminə Yusifqızı, məktəb rəhbərləri və bir qrup qabaqcıl müəllimlər iştitak edib. Dövlət Himninin səsləndirilməsi ilə başlayan tədbirdə Yevlax Şəhər Təhsil Şöbəsinin müdiri Zərifə Məmmədova iştirakçıları salamlayaraq təhsilin uğurlarından bəhs edən məruzə ilə çıxış edib. Çıxışında bildirdi ki, Dövlət Başçısının sərəncamları ilə son illər Yevlax rayonu üzrə 10 nəfər müəlliminin “Əməkdar müəllim” adına,   10 nəfər müəllimin “Tərəqqi” medalına layiq görülməsi, Təhsil Nazirinin əmri ilə 6 nəfərin “Azərbaycan Respublikasının Qabaqcıl Təhsil İşçisi” döş nişanı ilə təltif  edilməsi müəllim əməyinə dövlət tərəfindən verilən qiymətin əyani təzahürüdür. Tədbirdə 2018-ci ildə Azərbaycan Respublikası Prezidentinin 04 oktyabr 2018-ci il sərəncamı ilə şəhər 5 nömrəli tam orta məktəbin direktoru Zərxanım Əhmədovaya “Əməkdar müəllim” fəxri adının, şəhər 3 nömrəli tam orta məktəbin tarix müəllimi Səkinə Səmədovanın “Tərəqqi” medalı ilə təltif olunması, Azərbaycan Respublikası Təhsil Nazirliyi tərəfindən Şəhər Təhsil Şöbəsi Metodiki kabinetinin direktoru Xaləddin Niftəliyevin və şəhər 8 nömrəli tam orta məktəbin riyaziyyat müəllimi Solmaz Abdullayevanın “Azərbaycan Respublikasının Qabaqcıl Təhsil İşçisi” döş nişanı, şəhər 5 nömrəli  tam orta məktəbin riyaziyyat müəllimi Vəsilə İsayevanın və şəhər 3 nömrəli tam orta məktəbin biologiya müəllimi Könül Hüseynovanın  “Fəxri fərmanı”na layiq görülməsi rayonumuzun pedoqoji ictimaiyyətinin  əməyinə verilən ən yüksək qiymət kimi  dəyərləndirildi.

Sonda “Əməkdar müəllim” Zərxanım Əhmədova, “Tərəqqi” medalına layiq görülmüş Səkinə Səmədova, Yuxarı Qarxun kənd tam orta məktəbin müəllimi Camal Bərxudarov, gənc kadr Hacımahmudlu kənd tam ümumi orta məktəbin kimya müəllimi Nazlı  Babalı çıxış edərək ölkə prezidentinə təhsildə göstərdiyi diqqət və qayğıya görə minnətdarlıqlarını bildirdilər.