Bu günlərdə şəhid Polad Atakişiyev adına Qaraoğlan kənd tam orta məktəbində “Xalq Ordunun gücünə inanır” mövzusunda tədbir keçirildi. Vətənimizin ərazi bütövlüyü uğrunda mənfur ermənilərlə qanlı döyüşlərdə əbədiyyətə qovuşmuş  şəhidlərimizin əziz  xatirəsi bir dəqiqəlik sükutla yad edildikdən, Azərbaycanın Dövlət himni ifa olunduqdan sonra məktəbin  VIII- XI sinif şagirdlərinin iştirak etdiyi tədbir öz işinə başladı. Gənc nəslin hərbi vətənpərvərlik  tərbiyəsinin yüksəldilməsi mövzusuna həsr olunmuş  tədbirdə  məktəbin direktoru  Ağalar  Həsənov çıxış etdi. Vurğuladı ki, memarı ulu öndərimiz Heydər Əliyev olan müstəqil dövlətimizə 12 ildir ki, dünyagörüşü, müstəqil siyasi baxışları, qətiyyəti və iradəsi ilə beynəlxalq arenada tanınaraq səs və söz sahibi olan, respublikamızı Cənubi Qafqaz regionunda qüdrətli və güclü dövlətə çevirən  möhtərəm Prezidentimiz, Ali Baş Komandan İlham Əliyev cənabları rəhbərlik edir. Bu illər ərzində möhtərəm Prezidentimizin  yürütdüyü müdrik  daxili və xarici siyasəti, yorulmaz fəaliyyəti   Azərbaycanı  sürətli və dinamik inkişaf yoluna çıxarmış, sosial və iqtisadi həyatımızın bütün sahələrində möhtəşəm uğurlara imza atılmışdır.

A.Həsənov onu da qürur hissi ilə  dilə gətirdi ki, cəbhədə baş verən son hadisələr ölkəmizin hər bir vətəndaşının ruh yüksəkliyini, qələbəyə, ordumuzun yenilməzliyinə inamını daha da artırdı. Məktəbin müəllimlərindən Raziyə Bəkirova, Anar Həsənov və başqaları gənc nəsildə  hərbi vətənpərvərlik  tərbiyəsinin aşılanmasında müəllim və valideynlərin üzərinə düşən vəzifələrdən danışdılar.

Tədbirə dəvət olunmuş Qarabağ müharibəsinin veteranı Babaş Kərimov isə  vaxtilə keçdiyi döyüş yolu, vətən uğrunda şəhid olan əsgər yoldaşlarnın misilsiz  şücaəti barədə maraqlı, eyni zamanda acılı-şirinli  xatirələrini danışdı.

Şagirdlərdən Rizvan Musayev, Nuray Məmmədli, Saniyə Musayeva, İbrahim  Muradov, Məhəmməd Allahyarov, Dünyamin İbrahimov, Şəbnəm Mikayılova və başqaları məktəb rəhbərliyinin təşkilatçılığı  ilə  keçirilən  bu  tədbirin onlarda vətənpərvərlik hisslərini daha da artırdığını dilə gətirməklə, lazım gələrsə müqəddəs torpaqlarımızıın azad olunması naminə Vətənin çağırışına daim hazır olduqlarını bildirdilər.

Tədbir şagirdlərin hazırladığı mübarizliyə və rəşadətə səsləyən ədəbi-bədii kompozisiya ilə başa çatdı.