Martın 14-də Mərkəzi Aran Regional Təhsil İdarəsində 2022/2023-cü tədris ili üzrə təşkil olunmuş Respublika Fənn Olimpiadalarının yarımfinal mərhələsinin qalibləri ilə görüş keçirilib.

Görüşdə Mərkəzi Aran Regional Təhsil İdarəsinin müdiri Elçin Kərimov, Tədrisin keyfiyyəti sektorunun müdiri Cavad Cavadov, məktəb direktorları və olimpiadanın yarımfinal mərhələsində uğur qazanmış şagirdlər iştirak ediblər.

Görüşdə çıxış edən Təhsil İdarəsinin müdiri Elçin Kərimov şagirdlər arasında keçirilən fənn olimpiadalarının yüksək əhəmiyyətindən danışaraq RFO-nun final turunda iştirak hüququ qazanmış şagirdləri təbrik edib, eyni zamanda onların fənn müəllimlərinə və valideynlərinə öz təşəkkürünü bildirib.

Həmçinin olimpiada nəticələrinin məktəblərin reytinq ballarının hesablanmasında nəzərə alındığını vurğulayıb və eyni zamanda ali təhsil müəssisələrinə qəbul imtahanlarında şagirdlərin müvafiq ixtisaslar üzrə imtahansız qəbulunun bu sahəyə marağın artmasına səbəb olduğunu qeyd edib.

Olimpiadaların təşkilində məqsəd istedadlı uşaqların aşkar edilməsi, şagirdlərdə fənlərə olan marağın artırılması, onların  sağlam rəqabət mühitində öz bilik və bacarıqlarını nümayiş etdirmələrinə imkan yaradılmasından ibarətdir.

Qeyd edək ki, RFO-nun final turuna Mingəçevir şəhəri üzrə 23, Kürdəmir rayonu üzrə 7, Yevlax rayonu üzrə 5, Ağdaş rayonu üzrə 4, Göyçay və Zərdab rayonlarının hər biri üzrə 3 və Ucar rayonu üzrə isə 2 nəfər şagird olmaqla, ümumilikdə 47 nəfər şagird iştirak etmək hüququ qazanıb.

Olimpiadanın final mərhələsində iştirak edəcək bütün şagirdlərimizə uğurlar arzulayırıq!