Avqustun 25-də 2023/2024-cü tədris ili üzrə Mərkəzi Aran Regional Təhsil İdarəsinin tabeliyində fəaliyyət göstərən lisey və məktəb-liseylərin VII, VIII və IX siniflərinə qəbul imtahanları keçirilib.

Qəbul imtahanları Mingəçevir şəhəri, Ağdaş, Ucar, Zərdab və Kürdəmir rayonlarında, ümumilikdə 6 mərkəzdə təşkil olunub. İmtahan zamanı şagirdlərə tədris dili, riyaziyyat və müvafiq profil fənləri üzrə tapşırıqlar təqdim edilib.

Lisey siniflərinin yaradılmasında əsas məqsəd bölgələrdə istedadlı uşaq və gənclərin potensial imkanlarının aşkarlanması, inkişaf etdirilməsi və onların səmərəli təhsil almaları üçün lazımi şəraitin yaradılmasıdır.

Qeyd edək ki, qəbul imtahanlarının nəticələri növbəti həftə elan olunacaq və şagirdlər müvafiq keçid balını toplayacaqları təqdirdə “htpps://sy.edu.az” platforması üzərindən lisey/məktəb-lisey seçimi edə və ya növbəyə yazıldığı lisey/məktəb-liseyin müvafiq sinfinə sorğusu təsdiq olunacaqdır.

Aşağıda mərkəzləşdirilmiş qaydada qəbul prosesi keçirilən lisey və məktəb-liseylərin siyahısı ilə tanış ola bilərsiniz.

Mingəçevir şəhər R.Muradov adına Texniki-humanitar lisey;

Mingəçevir şəhər Təbiət, riyaziyyat və humanitar elmlər təmayüllü lisey;

Ağdaş şəhər S.Vurğun adına 1 nömrəli məktəb-lisey;

Ucar şəhər 1 nömrəli Texniki və humanitar fənlər təmayüllü lisey;

Zərdab şəhər H.Zərdabi adına 1 nömrəli məktəb-lisey;

Kürdəmir şəhər M.Ə.Rəsulzadə adına 1 nömrəli məktəb-lisey.