Fevralın 9-da Kürdəmir şəhər R.Quliyev adına 5 nömrəli tam orta məktəbdə əməkdar hüquqşünas, Azərbaycan Banklar Assosiasiyasının Bank Ombudsmanı, "Tərəqqi" medallı, "Şöhrət" ordenli İkram Kərimov ilə məktəblilərin görüşü keçirilib.

Görüşdə Kürdəmir Rayon İcra Hakimiyyətinin başçısı Elxan İbrahimov, Mərkəzi Aran Regional Təhsil İdarəsinin müdiri Elçin Kərimov, rayonun hüquq-mühafizə orqanlarının rəhbərləri, ictimaiyyət nümayəndələri və fəal gənclər, təhsil işçiləri və şagirdlər iştirak edib.

Tədbir Ulu Öndərin və şəhidlərin əziz xatirəsini bir dəqiqəlik sükutla yad edilməsi ilə başlayıb.

Görüşü giriş sözləri açan Kürdəmir RİH-nin başçısı Elxan İbrahimov tədbir iştirakçılarını salamlayaraq, İkram Kərimovun hüquq-mühafizə orqanlarında müxtəlif vəzifələrdə çalışmaqla yanaşı, gənc hüquqşünasların yetişdirilməsinə hər zaman öz töhfələrini verdiyini qeyd edib.

Çıxış edən təhsil idarəsinin müdiri Elçin Kərimov bu kimi maarifləndirici görüşlərin davamlı keçirilməsini və böyüməkdə olan gənc nəslin inkişafı üçün faydalı olduğunu vurğulayıb.

Daha sonra əməkdar hüquqşünas İkram Kərimov öz peşə fəaliyyəti, keçdiyi zəngin həyat təcrübəsini yeniyetmə gənclərlə bölüşüb və gələcəyin hüquqşünası olmaq istəyən gənclərə öz məsləhətlərini verib, sonra onların çoxsaylı suallarını cavablandırıb.

Qeyd edək ki, İkram Əliyev prokurorluq orqanlarında müstəntiq, mühüm işlər üzrə müstəntiq, rayon prokuroru, Bakı şəhər prokurorunun 1-ci müavini - istintaq şöbəsinin rəisi vəzifələrində çalışıb. İkram Kərimov həmçinin Bakı şəhər məhkəməsinin, Ağır cinayətlərə dair işlər üzrə Azərbaycan Respublikası Hərbi məhkəməsinin və Sumqayıt Apellyasiya Məhkəməsinin sədri vəzifələrində işləyib. Hazırda da İkram Kərimov Vəkillər Kollegiyası Ağsaqqallar Şurasının sədridir.